ISHK BHAI RADHA...ISHK HUA SHYAM

v  ishk mei ye dil yu madhosh ho gayaa
khaak thi sar mei soney sa damak gaya....
unko thi parvaah zamaaney ki
ye dewaano ki tarah mash hoor ho gayaa...
labrez tha ishk mei k sahoor bhi kho gayaa
har aahat lagi mahboob ki aur madmast ho gaya....
dunia ne tamashaa kiya aur sooli par charh gayaa
wo tha nashey mei choor khud khuda ho gaya...
radha ban meera ban har dil mei kahin kho gayaa
kabhi ashk ban rashk ki kataar kat gayaa...
na bujhaa na jalaa bass sailaab sa bah gayaa
aap tou dekhaa kiye aur wo hawaa sa guzar gayaa...
na poochh lena koi pataa wo har dil mei rah gayaa
shyam sa saanwra radha sa machal gayaa...
baansuri ki ek lahar mei wo fizaa mei ram gayaa
meera k dard mei ektaarey mei sanwar gayaa...
aaj bhi rahta hai mujhmey har lafz mei samaa gayaa
intezaar mei har chaah mei har aah mei samaa gayaa...
chhoot kar bhi mil gayaa labo par hi sil gayaa
ye ishk hai koi shart nahi... jisey mila khuda ko pa gayaa....
.......ishq ki inteha jab hoti hai tou fir dekhney samajhney ki shakti bhi kisi mei nahi rahti kyuki wo saundarya ki praakaashtha hoti hai ...jab sant haridas ji ko nidhivan mei sri krishna aur radha ji ki yugal jodi k darshan huey tou wo madhosh ho gaye aur unhoney vineet swar mei prabhu se praarthna ki k ye yugal jodi agar itney prem swaroop aur saundarya mei dunia ko dikhegi tou aam aadmi bardaasht nahi kar paayegaa aur paagal ho jaayega tou kripayaa prabhu aap dono ek roop mei prakat ho jaaein aur tabhi sri krishna radha dono ek roop ho gaye aur sri haridas ji ne SRI BAANKEY BIHAARI JI K ROOP KI STHAAPNAA KI...Aur aaj bhi yahi satya hai k nidhivan mei jo bhi sri krishna radha ji k raas mei rat us saundarya ko dekh leta hai tou baawlaa ho jata hai kyuki us saundarya ko bardaasht nahi kartaa...jab bhi do sachchey aur gahraaii se prem karney waaley vyakti miltey hain tou wahaan us saundarya ko dekhney wala koi nahi rah jata kyuki ishq kisi ko is kaabil chhorhtaa hi kahaan hai ...

RADHASWAMIJI...JAI SRI KRISHNA JI...

BY---Chhavi Mehrotra